Landvættirnir svara fyrir okkur !

Mikið held ég að vinir mínir á Englandi séu með undarlega tilfinningu núna, jarðskjálfti að hrista múrsteinahúsin þeirra og gifsveggina...hehehe...það mætti segja mér að þetta sé yfirlýsing frá almættinu, gaman væri að vita hvað JVJ finnst um það...

Við íslendingar getum allavega glott illyrmislega og hugsað þeim þegjandi þörfina, ég geri það...enda illa innrættur hryðjuverkamaður og illmenni. Það er næstum viðeigandi að skíra þennan skjálfta, t.d. Brown eða Darling, nú eða Viking.

Ég og félagi minn höfum verið að segja það undanfarið hér í sveitinni, að það sé kominn tími á að englendingar sjái röndótt ferhyrnd segl við sjóndeildarhringinn aftur, en viti menn, landvættirnir hafa heyrt til okkar og gengu sjálfir í verkið og mögnuðu upp gerningaskjálfta til höfuðs englendingum. That will teach the soddin' fuckin' tossers!

Heill Vættum okkar og forneskju !!

Hryðjuverkasamtökin Ísland.

Skjálfti skekur Breta

Núnúnú, er þetta rétti tíminn?

Væri ekki nær að skoða bankamálin ? Allt frá Búnaðarbankamáli til dagsins í dag ?

Það hefði ég haldið....

Ríkissaksóknari ákveður að fara í saumana á Hafskipsmálinu

Tónleikar næsta sunnudagskvöld á Café Rósenberg.

Gaman væri að sjá sem flesta, ég byrja um tíuleytið og spila eitthvað frameftir. Leynigestur bætist í hópinn, og kannski fleiri en einn...góða skemmtun, þið sem mætið og fyrirfram þúsund þakkir.

Íslendingar orðnir hryðjuverkamenn ?

Skuggaleg staða sem stuttbuxnastrákarnir eru búnir að koma okkur í, milliríkjadeilur og ábyrgð gagnvart fólki í öðrum löndum. Það hlýtur að vera hægt að kalla einhverja til ábyrgðar svo við getum í það minnsta bjargað andlitinu út á við. Ég kyngi því ekki að menn geti leikið sér með afkomu fólks vítt og breytt um heiminn, staðið í áhættufjárfestingum með peninga annarra og tapað öllu, án þess að þurfa að sæta ábyrgð.Að ríkið ( ég ) axli þá ábyrgð og byrðar án þess að bera neina sök í þessu, að öðru leyti en því að eftirlitsstofnanir virðast hafa sofið á verðinum, eða ekki kunnað starfið sitt, er fáránleikinn einn.Það kemur ekki til greina að ég sætti mig við hlutverk sökudólgs í þessu botnlausa rugli, ég hlýt að krefjast þess að menn verði dregnir til ábyrgðar, ég neita að bera sök sem ekki er mín, ég krefst þess að viðkomandi eftirlitsstofnanir og aðilar innan Seðlabankans, segi af sér og þeir / þau sótt til saka þar sem það á við.

Það eru landráð að eyðileggja ímynd landsins og grafa undan velferð þess og afkomu, það eru landráð að ráðast að innviðum samfélagsins.

Ég vil sjá höfuð fjúka.

Brown hótar aðgerðum

Barnaníðingar missa fylgi..........

......og hvað er það sem segir að áhugaleysi um biblíuna jafngildi trúleysi ?

Kaþólska kirkjan er ekki að missa fylgi vegna áhugaleysis, heldur vegna þess að um stund höfðu menn engan áhuga á því að efast eða gagnrýna það sem kom úr munni prestanna, en nú hefur áhugi fólks á því gert fólk afhuga kirkjunni....og það er hið besta mál.

Hverskonar framkoma er þetta.....er konan gersneydd sómatilfinningu?

Þetta þykja mér merkilegar fréttir. Það er ljóst að samdráttur í ríkisútgjöldum skal bitna á þeim sem eru hluthafar.

Þegar samdráttur er boðaður í vel reknu fyrirtæki, er kröftunum beitt þar sem þeirra er mest þörf til að halda fyrirtækinu gangandi. Stjórnin hefur skyldum að gegna gagnvart hluthöfum. Þetta þýðir meðal annars að fótboltaferðir til útlanda eru blásnar af, gæluverkefni sett á bið, og aðhald sýnt til að tryggja eign hluthafanna.

Fyrirtækið Ísland er ekki vel rekið fyrirtæki. Það ríkir sundrung í stjórnarherberginu, stjórnarfólk er skeytingarlaust um fyrirtækið og hluthafana og eru jafnvel ekkert að hafa fyrir því að mæta í vinnuna. Og sumir eru bara að horfa á fyrirtækisliðið spila fótbolta.....

Mér er farið að verða flökurt yfir virðingarleysi stjórnar fyrirtækisins og bókhaldið sýnir glögglega að þarna ríkir óráðsían ein og stjórnin hundsar vilja hluthafanna og lætur sem hún eigi fyrirtækið. Ég vil með hliðsjón af þessu hvetja aðra hluthafa í þessu fyrirtæki, til að sameinast um að koma þessari stjórn frá og skipa nýja stjórn sem gæti hugsanlega hugsað sér að vinna fyrir okkur og fyrirtækið. Það er algjörlega óásættanlegt að reglur fyrirtækisins nái ekki yfir stöðu sem þessa og stjórnarmeðlimir reknir og/eða hýrudregnir fyrir svona frammistöðu. Þessu þarf að breyta. Það á ekki að hafa áhrif á vinnu þessa fólks í hvaða spilaklúbbi, góðgerðarstofnun, kirkju, fótboltafélagi eða stjórnmálaflokki, það er. Ekki frekar en drykkja eða geðsjúkdómar megi hafa áhrif.

Einnig þykir mér rétt að endurskoða ráðningarferli fyrirtækisins, og gera þar sérhæfðari kröfur til umsækjenda. Kröfur um menntun, starfsreynslu og pólitískt hlutleysi. Einhver t.d. réði dýralækni í stöðu framkvæmdastjóra fjármálasviðs, og það er einhver fjósalykt af því.

Já, fyrirtækið okkar er hreinlega í slæmum málum á meðan stjórn þess er að sinna gæluverkefnum, utanlandsferðum og sjálfri sér, þetta er óþolandi staða og við hluthafar þurfum nauðsynlega að fara að skoða betur hvað þetta fólk er að gera. Annars fer fyrir okkur eins og hluthöfum í FL group.

Þorgerður Katrín: Ætla að öskra mig hása

Innanríkisráðuneyti, leyniþjónusta, greiningardeild ?

Mikið fer í taugarnar á mér hvað BB og Co eru úr öllum tengslum við raunveruleikann, þegar kemur að því að upplýsa landsmenn, öðru nafni vinnuveitendur sína, um hvað þeir félagar eru að gera. Ekki lýst mér á þetta brölt. Öryggis-og greiningarþjónusta, hvað er það ? Á þetta að vera til varnar íslenskum stjórnvöldum ? Til höfuðs skipulagðri glæpastarfssemi, Falung Gong, hernaðarandstæðingum, Saving Iceland........eða allt ofangreint eða hvað?

Er þetta kannski hugsað sem endanleg lending fyrir Ríkislögreglustjóraembættið ?

Mér þykir ekki boðlegt að maður sem er búinn að lýsa því yfir að fólki komi ekkert við hvað stjórnvöld eru að gera, búinn að heimta lög af Alþingi sem hefta stórlega mannréttindi, og skerða friðhelgi einkalífs fólks sem ekkert hefur gert af sér, skuli nú enn herða róðurinn í átt til þess að minnka möguleika fólks til að hafa yfirráð yfir sér og sínu einkalífi.

BB er duglegur náungi, en hann er líka forn í hugsun, því þótt hann sé að reyna að innleiða nýja hluti í íslenskt samfélag, þá er þetta gamalt og súrt vín á rykföllnum og fúnum belgjum.

Það þykir mér ljóst að ef það á að bæta öryggið í heiminum, þá eru það ekki greiningardeildir sem gera það. Vandinn liggur ekki þar, heldur í því ástandi sem þeir sem helst vilja sjá svona aðferðir, eru búnir að skapa.....

......svolítið eins og Omega - presturinn sem segir ,ég skal selja þér svör við spurningum sem ég segi þér að spyrja..........ég skal selja þér skjól frá óttanum sem ég kveikti í brjósti þér......

Ég treysti ekki þessu fólki til að hafa það vald sem það vill fá, alls ekki.

En þið ?

Drög um öryggis- og greiningarþjónustu kynnt

Kominn heim í heiðardalinn...

Þá er maður enn á ný kominn til Akureyrar.

Tónleikar hjá Skrokkabandinu í Populus Tremula,byrjum stundvíslega um það bil um tíuleytið.

Allir velkomnir.

Innflytjendur, vandamál eða fórnarlömb ?

Undanfarið hefur verið mikið skrafað um nýliðnar aðgerðir lögreglu gegn hælisleitendum á Suðurnesjum. Sýnist þar sitt hverjum eins við var að búast. Tvær fylkingar fólks hafa verið þar hvað mest áberandi. Annars vegar eru það þeir sem sjá ekkert athugavert við þessar aðgerðir og hins vegar þeir sem sjá ekkert athugavert við að fólk virði ekki lög og reglur.

Báðir þessir hópar eru sama markinu brenndir að því leyti til að þeir fara fram af þröngsýni og gerræði. Annar hópurinn gengur út frá því að allir hælisleitendur séu svindlarar og glæpahyski, hinn gengur út frá því að allir hælisleitendur séu fórnarlömb og illa sett fólk sem á ekki neina von. Hvorugur hópurinn er að setja málin í einhverja skynsamlega umræðu,  koma í raun í veg fyrir að slíkt sé hægt.

Sjálfur er ég á því að herða eftirlit með því hverjir eru að koma hingað og af hverju, en mér er ekki sama hvernig farið er að því. Þessvegna er ég á því að AÐGERÐIR lögreglu í þessu umtalaða tilviki hafi verið réttlætanlegar, en AÐFERÐIRNAR, eru mér ekki að skapi.

Ótrúlega margir gera engan mun á þessu tvennu, AÐGERÐIR og AÐFERÐIR, þetta eru tvö orð sem þýða tvo mismunandi hluti.

Það er hinsvegar búið að vera ótrúlegt að fylgjast með og taka þátt í þessum umræðum, sem byggjast eingöngu á heift og þröngsýni. Þeir sem hafa hvað hæst um að ekkert hafi verið athugavert við þessar aðgerðir lögreglu, ganga gjarnan útfrá því að þarna hafi fólk verið brotlegt. Það er rétt þau voru sum brotleg, en það t.d. afsakar hvorki framkomuna við þá sem ekkert höfðu af sér gert, né hina. Íslensk lög segja nefnilega að það er ekki hlutverk lögreglu að dæma eða refsa fólki á einn eða annan hátt. Svo eru það hinir, á hinum endanum sem vilja meina að ekki skuli fylgst með og sigtað út það fólk sem ætlar sér að ljúga sig inn á okkur og vera hér jafnvel bara til vandræða. Opin landamæri eru vandmeðfarin og ekki mikil von til þess að við sleppum við svörtu sauðina sem flestir nágrannar okkar eru að súpa seyðið af að hafa verið of "mjúkir" við í upphafi.

Þetta eru alvarleg mál sem þurfa á einhverjum vitrænum umræðugrundvelli að halda, ég hef sagt það áður og segi það aftur, við erum einfaldlega ekki tilbúin, hvorki til að vera þeir góðu gestgjafar sem ég treysti löndum mínum til að vilja vera, né til að takast á við erlenda skúrka sem t.d. leggjast eins og blóðsugur á landa sína með mafíutilburðum og félagslega kerfið okkar.

Það er góður tími nú þegar svona mál koma upp að skoða stöðuna og taka svo einhver ígrunduð skref í stað þess að ryðjast áfram af offorsi og öfgum.

Er Fangelsismálastofnun ábyrgðarlaus sýndarstofnun.....

.....eða eru allir sofandi sem þar starfa ?

Nýverið fréttist það hingað heim að Ágúst Magnússon, margfaldur barnaníðingur, sem hikar ekki við að rjúfa skilorð til að reyna koma höndum yfir börn, hafi fengið leyfi fangelsismálastofnunar til að " mennta " sig í biblíuskóla í Svíþjóð. Þar átti hann að fá leigt herbergi á heimili fjölskyldu með tvö börn.´Við þessar fréttir stukku margir til og vöruðu svíana við, og það er komið á daginn að engar upplýsingar um alvarleika brota Ágústs, og einbeittan brotavilja, komu frá Fangelsismálastofnun.

Ágúst er á skilorði og því á ábyrgð yfirvalda hér.

En þetta hugnaðist ekki forsvarsmönnum þessa safnaðar í Svíþjóð svo hætt hefur verið við innritun Ágústar í biblíuskólann, og hann sendur heim. Fólkið þarna úti, bæði íslendingafélagið sem og meðlimir safnaðarins er gáttað á þessum fráleitu vinnubrögðum yfirvalda hér, og satt best að segja er það nú vel skiljanlegt.

Fangelsismálastofnun hefur áður sýnt ámóta ábyrgðarleysi í tengslum við þennan sama mann. Það var þegar hann var settur inn á Vernd í Teigahverfi, rétt við grunnskóla og leikskóla, og enginn látinn vita um hvers kyns væri. Ekki skólayfirvöld, ekki leikskólastjóri, ekki foreldrafélagið, ekki presturinn....ENGINN!

Það var svo ekki fyrr en foreldrafélagið í skólanum heimtaði manninn burt að eitthvað var gert.

Á fundi sem haldinn var með foreldrafélaginu í Laugarnesskólanum, skólastjórn, og fulltrúum Fangelsismálastofnunar og Verndar, kom fram að hann uppfyllti skilyrðin um vist hjá Vernd, en ekki hafi verið talin hætta á að hann bryti af sér aftur,sem reyndist náttúrulega rangt.

Mér er spurn, er ekki eðlileg krafa að umhverfi þessara manna sé ekki skólar og leikskólar ?

Er eðlilegt að Fangelsismálastofnun, sýni ábyrgðarleysi af þessu tagi ?

Er Fangelsismálastofnun ábyrg ef hann nauðgar barni meðan hann er á skilorði ? Jafnvel búandi á Vernd ?

Ágúst er aftur kominn til landsins og er hér á ábyrgð Fangelsismálastofnunar, þar sem hann er á skilorði.

SÝNIÐ ÁBYRGÐ, SINNIÐ SKYLDUM YKKAR.....er það til of mikils vænst af Fangelsismálastofnun ?